Nafarroako Gobernuak boluntariotza bultzatzen du Nafarroa + Boluntarioa plataformaren bidez, eta, egun, 3.000 pertsona inguru daude bertan inskribatuta. Nafarroako Boluntarioa saria sortu da, 2024tik aurrera, beren dedikazioa, gizarte-eredua edo jardueren garrantzia dela-eta nabarmentzen diren boluntarioak saritzeko. Horrez gain, Boluntariotzako III. Plana egiten ari dira, eta, bertan, datozen lau urteetan Foru Komunitatean bultzatzeko neurriak eta lehentasunak ezarriko dira. 
 

​​

Nafarroako Gobernuak eta Nafarroako Unibertsitate Publikoak (NUP) abian jarri dute Genero Ikasketen eta Ikasketa Feministen Katedra. Neurri horren helburua da era horretako ikasketak finkatzea ikerketaren eta irakaskuntzaren arloetan eta unibertsitate-komunitatea bera gainditzea, herritar guztiengana iristeko. 

​​

Foru Komunitatea gogor ari da lanean eskualde arteko bazkideekin, mugaz gaindiko espazioa eta proiektu partekatuak sustatzeko. Duela gutxi, sinbolismoz betetako gertaera gertatu da, ia hiru urteko elkarrizketa eta kudeaketen ondorioz; hau da, Izpegi, Urkiaga eta Larrauko azken hiru muga-pasabideak berriro irekitzea, Frantziako aldeak ofizialki itxita baitzituen 2021eko urtarrilaz geroztik, arrisku terroristako arrazoiak zirela-eta. 

​​

Ikasturte honetan, Memoriadun Eskolen edizio berria jarri da martxan. 8.000 ikasle baino gehiagok eman dute izena, eta horiei Bakearen eta Bizikidetzaren aldeko Eskolen programako 19.500 ikasle gehitu behar zaizkie. Horrez gain, Donezteben, nazioarteko tailer bat egin da Landscapes of Devastation (Suntsipen-paisaiak) proiektuaren barruan; hau da, artearen bidez Gernika, Gijon, Berlin, Tesalonika edo Kyiv bezalako Europako herrietan gerrak izandako ondorioak aztertzen dituen ekimena. Bestalde, Bakearen Nazioarteko Eguna dela-eta, +34 Fundazioa saritu zen atzerriko herrialdeetan askatasunaz gabetutako pertsonei emandako laguntzarengatik. 
 

        ​​

Nafarroako Gobernuak Gurutze Gorriarekin duen kontratua berritu du, Atzerritartasunaren arloan eskaintzen dituen aholkularitza-zerbitzuak indartzeko. Zerbitzu horiek ia 5.500 migratzaile artatu dituzte urteko lehen bederatzi hilabeteetan. Kontratu berriari esker, zerbitzuan giza baliabide gehiago jarri, arreta-puntu berriak sortu eta telefono bidezko arreta zentralizatu ahal izango dira, erabiltzaileek burutu beharreko prozesu burokratiko asko ebatzi eta gauzatu ahal izan ditzaten. 
 

​​

Nafarroako hezkuntza-sareak Gizarteratzeko Foru Agindu berria du, eta familiei beren ikasleak nahi duten ikastetxeetara eramatea bermatzen die. Ikasle guztien aniztasuna kontuan hartzeko neurriak arautzen dira, bereziki laguntza-premia espezifikoak dituzten ikasleei eta batez ere hezkuntza-premia bereziak dituztenei (37.000, kopuru osoaren %26) erreparatuta. Oro har, ikasleak ikastetxe arruntetan eskolatuko dira, eta alde indibidualak, interesak, hizkuntzak ikasteko programa ezberdinak egiteko beharrak eta antzekoak direla-eta bereiziko dituzten taldeak ezartzea saihestuko da. 
 

​​

Nafarroako Gobernuak funtsezko bi inkesta atera ditu urteko azken hiruhilekoan, osasun-sistema hobetzeko puntuak ezartzeko: 2023ko laneko giroari buruzko inkesta eta Osasunbidea-Nafarroako Osasun Zerbitzuan artatutako pertsonen gogobetetzeari buruzko inkesta. Bi inkesten emaitzak 2024ko lehen lauhilekoan eskuratu ahal izango dira. 

Aurreko legegintzaldiaren amaieran sortutako eta Exekutibo berriaren akordio programatikoan jasotako Ekitate Beken bigarren edizioa atera du Nafarroako Gobernuak. Laguntza-deialdi berria 570.000 eurokoa da, eta, horri esker, errenta-maila txikiko ingurunekoak diren eta errendimendu akademiko ona duten hamar gaztek erabat ikasketetan aritu ahal izango dute, unibertsitate-prestakuntza lortzeko. Horretarako, ikasturte bakoitzeko 9.500 euro emango zaizkio onuradun bakoitzari. 
 

​​

Nafarroako Gobernuak Abentura Digitalaren programaren bidez trebakuntza digitalaren arloko prestakuntza eskaintzen du doan, eta maila aurreratura zabaldu da, eta, era horretan, Adimen Artifizialari, hodeiko lanari eta zibersegurtasunari buruzko ikastaroak antolatu dira. Programa 2022an ezarri zen, eta Europako Next Generation funtsekin finantzatu da. Programa Nafarroako herritarren aniztasun zabala artatzeko diseinatu da; hots, maila ertaineko ikasleetatik hasi eta goi mailakoetaraino, tartean adinekoak, erretiratuak eta baztertze digitala jasateko arriskuan dauden kolektiboak ere bai. 
 

​​

Lehen sektoreak ziurgabetasun-testuingurua bizi du, Europako Nekazaritza Politika Bateratuaren eredu berria indarrean sartzeagatik eta produkzio-kostuen igoerak, lehortearen ondorioek eta merkatuen globalizazioak baldintzatutako ingurunearengatik. Modu horretan, Nafarroa izan da NPBren aurrerakinak gauzatzen hasi den komunitateetako bat. Foru Gobernua 31,4 milioi euro ordaintzen hasi da 11.000 nekazari eta abeltzain baino gehiagorentzat, abenduan 2024rako laguntzen %90 eta %95 artean izatea lor dezaten. 
 

​​

Foru Gobernuak Nafarroako Kulturaren 2024-2028 Plan Estrategikoa egiteko kontsulta-prozesua abian jarri du. Foru Komunitaterako kultura-arloko ibilbide-orria egiteko hausnarketa parte hartzeko 15 lan-mahairen inguruan egingo da. Horietako 6 lurralde osoan zehar banatuta daude, 7 izaera sektorialekoak dira eta beste 2 mahai zeharkakoak, gazterian oinarrituak. Fase horretan, Nafarroako kultura- eta sormen-sektorearen egungo egoera ebaluatzeko eta horren diagnostikoa egiteko lanak ere egingo dira. 

​​